फुङ्लिङ नगरपालिकाद्वारा बालमन्दिरका शिक्षक र विद्यार्थीलाई जाडो राहत

ताप्लेजुङ, पुस २४ 

    ताप्लेजुङको सदरमुकाम फुङ्लिङस्थित बालमन्दिर आधारभूत विद्यालयका शिक्षक र विद्यार्थीलाई जाडो मौसमबाट जोगाउन न्यानो टोपी वितरण गरिएको छ । फुङ्लिङ नगरपालिका र कोअपरेटिभ्स युथ अर्गनाइजेसन धादिङको आर्थिक सहयोगमा बुधबार टोपी वितरण कार्यक्रम सम्पन्न भएको हो।   

     विद्यालयमा कार्यरत १२ जना शिक्षक र ८५ जना विद्यार्थीलाई जाडोयाममा प्रयोग हुने न्यानो टोपी प्रदान गरिएको छ । फुङ्लिङ नगरपालिकाका प्रमुख अमिर मादेन, शिक्षा शाखाका अधिकृत प्रकाश पौडेल लगायतको उपस्थितिमा शिक्षक तथा विद्यार्थीलाई टोपी हस्तान्तरण गरिएको हो।

     प्रधानाध्यापक धर्मप्रसाद पौड्यालका अनुसार जाडो मौसममा न्यानो टोपीले बालबालिका तथा शिक्षकको स्वास्थ्य संरक्षणका साथै नियमित पठनपाठनमा पनि सकारात्मक प्रभाव पार्ने अपेक्षा गरिएको छ । उहाँले सहयोग उपलब्ध गराउने फुङ्लिङ नगरपालिका र सहयोगी संस्थाप्रति धन्यवाद तथा आभार व्यक्त गर्नुभयो। टोपी वितरण कार्यक्रमलाई सम्बोधन गर्दै नगर प्रमुख मादेनले आगामी शैक्षिक सत्र २०८३ मा दुई जना शिक्षकको दरबन्दी व्यवस्था गर्ने र चार कोठे विद्यालय भवन निर्माणका लागि बजेट विनियोजन गरिने प्रतिबद्धता जनाउनुभयो।