काठमाडौँ महानगरपालिकाको पहल: रुद्रमति खोलामा व्यापक सरसफाइ अभियान

   काठमाडौँ ,  ९ चैत

      काठमाडौँ महानगरपालिकाले सहरको बीच भाग भएर बग्ने रुद्रमति खोलालाई सफा र व्यवस्थित बनाउने उद्देश्यले व्यापक सरसफाइ अभियान सञ्चालन गरेको छ। पछिल्लो समय सहरको सौन्दर्य अभिवृद्धि र वातावरणीय सुधारलाई प्राथमिकतामा राख्दै महानगरले यस्तो अभियानलाई तीव्रता दिएको हो।

         महानगरका अनुसार लामो समयदेखि फोहोर, झारपात र अव्यवस्थित अवस्थाका कारण प्रभावित बनेको रुद्रमति खोलालाई पुनः स्वच्छ र आकर्षक बनाउने लक्ष्य राखिएको छ। यसका लागि खोलाको किनार तथा आसपासका क्षेत्रमा विशेष ध्यान दिइँदै सरसफाइका कामहरू निरन्तर रूपमा अघि बढाइएको छ।

    अभियान अन्तर्गत खोलामा जम्मा भएको फोहोर संकलन गरी व्यवस्थापन गर्ने, किनारमा उम्रिएका झारपात हटाउने तथा अव्यवस्थित रूपमा फैलिएका वनस्पतिलाई नियन्त्रण गर्ने कार्य भइरहेको छ। साथै, महानगरले यसअघि रोपेका फूलका बोटबिरुवाहरूको काँटछाँट गरी तिनलाई व्यवस्थित र आकर्षक बनाउने कामसमेत सँगसँगै अघि बढाएको छ।

\

       महानगरपालिकाले जनाएको अनुसार सरसफाइ अभियानलाई केवल एकपटकको कार्यक्रम नभई नियमित रूपमा सञ्चालन गरिनेछ। यसले नदी क्षेत्रको संरक्षण, वातावरणीय सन्तुलन कायम राख्न तथा नागरिकलाई स्वच्छ वातावरण उपलब्ध गराउन महत्वपूर्ण भूमिका खेल्ने विश्वास गरिएको छ।

     त्यसैगरी, नदीमा जथाभावी फोहोर फाल्ने प्रवृत्तिलाई निरुत्साहित गर्न जनचेतना अभिवृद्धि गर्ने योजना पनि महानगरले अघि सारेको छ। स्थानीय बासिन्दा, संघसंस्था तथा सरोकारवालासँग सहकार्य गर्दै सरसफाइ अभियानलाई अझ प्रभावकारी बनाउने लक्ष्य लिइएको छ।