गाउँपालिकाहरूको सहरमा सेवा अभियान: नागरिकमैत्री पहल

गोरखा,भाद्र ३

  गाउँपालिकाहरूको सहरमा सेवा अभियान

   नेपालका विभिन्न गाउँपालिकाहरूले आफ्ना नागरिकलाई सहरमा पुगेर सेवा दिन थालेका छन्, जसले स्थानीय सरकारको सक्रियता र नागरिकप्रति जिम्मेवारीको नयाँ उदाहरण प्रस्तुत गरेको छ।

गोरखाको बारपाक सुलिकोट गाउँपालिकाको पहल

    गोरखाको बारपाक सुलिकोट गाउँपालिकाले साउन महिनाको अन्तिम साता काठमाडौँ र चितवनमा शिविर सञ्चालन गर्‍यो। पालिकाले सामाजिक सुरक्षा भत्ता नवीकरणका लागि नागरिकलाई सहरमै पुगेर सेवा दिएको हो। पालिकाका प्रमुख प्रशासकीय अधिकृत सुवास आलेका अनुसार, साउन २६ र २७ गते चितवनमा र २९ देखि ३१ गतेसम्म काठमाडौँमा शिविर सञ्चालन गरिएको थियो।

मनाङको नार्पाभूमि र सिरान्चोक गाउँपालिकाको सक्रियता

  मनाङको नार्पाभूमि गाउँपालिकाले पनि काठमाडौँमा शिविर सञ्चालन गरेर आफ्ना नागरिकको सामाजिक सुरक्षा भत्ताको नवीकरण गराएको छ। गाउँपालिकाको टिम हप्तौँसम्म काठमाडौँमा बसेर सेवा दिएको पञ्जीकरण शाखाका प्रमुख वीरेन्द्रसिंह बोहोराले जानकारी दिए। उनले भने, निकट भविष्यमै पोखरामा पनि यस्तै खालको शिविर सञ्चालन हुनेछ।

   गोरखाकै सिरान्चोक गाउँपालिकाले काठमाडौँको वनस्थलीमा साउन ३० गतेदेखि सुरु गरेको चार दिने घुम्ती शिविर आज सकिँदैछ। पालिकाले आफ्ना नागरिकलाई सहज होस् भनेर आवश्यक कागजातसहित  उपस्थित हुन सूचना नै जारी गरेको थियो। गाउँपालिकाका जनप्रतिनिधि र कर्मचारी सहितको टोलीले सेवा दिइरहेको पालिका अध्यक्ष ज्ञानेन्द्र गुरुङले बताए।

म्याग्दीको धवलागिरि गाउँपालिकाको काठमाडौँ र पोखरामा सेवा

  म्याग्दीको धवलागिरि गाउँपालिकाले पालिका अध्यक्ष र उपाध्यक्ष सहित सातवटै वडाका अध्यक्ष र सचिव सहितको टोली लिएर काठमाडौँमा शिविर सञ्चालन गरेर फर्किएको छ। १८ र १९ गते सञ्चालित शिविरमा डेढ सय जनाले सेवा लिए। सोही टोलीले पोखरामा पनि सेवा दिएर पालिका फर्किएको छ। खासगरी सामाजिक सुरक्षा भत्ता नवीकरण, जन्मदर्ता र सिफारिस जस्ता सेवा शिविरबाट दिइएको पालिकाले जनाएको छ।

बायोमेट्रिक अनिवार्यताका कारण सहरमा सेवा

   सामाजिक सुरक्षा भत्ता नवीकरणको लागि बायोमेट्रिक अनिवार्य भएका कारण पनि पालिकाहरू नागरिक खोज्दै सहर झर्नुपर्ने बाध्यतामा पुगेका हुन्। बारपाकका प्रमुख प्रशासकीय अधिकृत सुवास आलेले भने, असक्त र बिरामी नागरिकको सहजताका लागि बसेकै ठाउँमा पुगेर सेवा दिएका हौँ।

 सिरान्चोक गाउँपालिका अध्यक्ष गुरुङले भने,बर्खाको समयमा गाउँसम्म पुग्ने कष्ट र झन्झटबाट नागरिकलाई मुक्त गर्न पालिका नै सहर पुगेर सेवा दिएको हो।

विकट भूगोलका कारण सहरमा सेवा

 
   नार्पाभूमि गाउँपालिका अध्यक्ष कोञ्जो तेन्जिङ लामाले विकटताका कारण सधैँभरि नागरिकहरू पालिकाभित्रै बस्न सक्ने अवस्था नरहेको बताए। उनले भने, हाम्रो भूगोल नै निकै विकट छ। यति सानो कामका लागि नागरिकलाई गाउँ फर्काएर दुःख दिनुभन्दा हामी आफैँ उहाँहरू भएकै ठाउँमा पुगेर सेवा दिनु हाम्रो दायित्व हो।