खाँदबारी नगरपालिकामा डेंगी रोकथामका लागि जनचेतना अभियान सञ्चालन

सङ्खुवासभा, ५ भाद्र 

   डेंगीको जोखिमलाई मध्यनजर गर्दै आज खाँदबारी नगरपालिका र स्वास्थ्य कार्यालयको संयुक्त आयोजनामा पानी जम्न नदिऔँ, लामखुट्टेको फूल नष्ट गरौँ भन्ने नारासहित जनचेतनामूलक अभियान सञ्चालन गरिएको छ।

    यस अभियानमा नेपाली सेना, नेपाल प्रहरी, विद्यार्थी, युवा क्लब र विभिन्न सङ्घसंस्थाहरूको सक्रिय सहभागिता रहेको थियो। सहभागीहरूले टोलका झाडी फाँड्ने, पानी जम्ने भाँडा खाली गर्ने र समुदायलाई डेंगीका लक्षण र रोकथामका उपायहरू बारे जानकारी दिने पर्चा वितरण गरे।

   जिल्ला समन्वय समिति प्रमुख सुमन शाक्यले डेंगी हिमाली जिल्लासम्म फैलिनु चिन्ताजनक भएको बताउनुभयो। स्वास्थ्य कार्यालयका जनस्वास्थ्य अधिकृत रोशन श्रेष्ठका अनुसार साउन र भदौ महिनामा ७८ जनामा डेंगी सङ्क्रमण पुष्टि भएको छ।

   स्वास्थ्यकर्मीका अनुसार एडिस एजिप्टी नामक लामखुट्टेले बिहान र बेलुका सफा पानीमा फूल पार्ने भएकाले घर वरिपरि पानी जम्न नदिने र नियमित सरसफाइ गर्ने मुख्य रोकथामका उपाय हुन्। वर्षायाममा अझ बढी सतर्कता अपनाउन उनीहरूले अनुरोध गरेका छन्।