सिमकोट गाउँपालिकामा घर तोडफोड बढ्दा स्थानीय त्रसित

हुम्ला, भदौ ३० 

 सिमकोट गाउँपालिका–७ अन्तर्गतको डाँडाफया गाउँमा पछिल्ला दिनहरूदेखि निरन्तर घर तोडफोडको घटना बढ्दै गएको छ । स्थानीयवासीका अनुसार पहिचान नखुलेको अज्ञात समूहले भदौ २९ गते राति मात्रै सात घरमा तोडफोड गर्दै घरभित्रका सामग्री समेत लगेका छन्।

   घटनाबाट प्रभावित नरबहादुर शाहीका भनाइमा गाउँका अधिकांश बासिन्दा हिउँदमा औलतर्फ र वर्षायाममा लेकतर्फ बसाइँ सर्ने परम्परा रहेको छ। यस्तो अवस्थामा औलका घरहरूमा सुनदेखि नुनसम्मका मूल्यवान सामान राखिने चलन छ, जुन समयमा अज्ञात व्यक्तिहरूले घरमा धावा बोलेर ढोका तोड्ने र सामग्री लुट्ने गरेको आरोप छ।

  भदौ २९ गते तोडफोडमा परेका घरधनीहरूमा कृष्ण शाही, नरबहादुर शाही, जनमनि बिक, जानबहादुर शाही, अंगबहादुर शाही, चैते शाही र बलि कामी रहेका छन्। स्थानीय मन्दिर सिंहका अनुसार, केही दिनअघि गोपी सिंह, दिपक सिंह, धनबहादुर शाही, लंकबहादुर शाही, विशाल सिंह र मन्दिर सिंहकै घरमा समेत तोडफोड भएको थियो।

लगातार घटना दोहोरिँदा गाउँ त्रसित बनेको छ। “देशमा राज्य नै छैन जस्तो अवस्था देखिन थालेको छ,” स्थानीय सिंहले चिन्ता व्यक्त गरे।