शिवसताक्षी नगरपालिका–१० मा मामा–भान्जाद्वारा अपहरणपछि हत्या, दुई पक्राउ

झापा, कात्तिक २१

   झापाको शिवसताक्षी नगरपालिका–१० का ३३ वर्षीय सरोज शर्माको अपहरण र हत्या गरेको अभियोगमा प्रहरीले दुई जनालाई पक्राउ गरेको छ। पक्राउ परेकामध्ये मृतकका छिमेकी मामा–भान्जा सुनील साह (२७) र राहुल साह (२३) रहेका छन्।जिल्ला प्रहरी कार्यालय झापाले आइतबार पत्रकार सम्मेलन मार्फत उनीहरूलाई सार्वजनिक गरेको हो। प्रहरीका अनुसार सुनीललाई विराटनगरको रानी क्षेत्रबाट र राहुललाई उनको घरमै नियन्त्रणमा लिइएको हो।

शव बिरिङ खोलामुनि फेला, कार जंगलमा जलेको अवस्थामा

प्रहरी नायब उपरीक्षक (डीएसपी) खगेन्द्रबहादुर खड्काका अनुसार, शनिबार बिहान झापा गाउँपालिका–५ स्थित बिरिङ खोलाको पुलमुनि गाडिएको अवस्थामा शर्माको शव फेला परेको थियो। यसअघि १३ कात्तिकमा शर्मा सवार किया सेल्टस कार मेचीनगर–१३, निचाझोडा सिमसार नजिकैको जंगलमा जलेको अवस्थामा भेटिएको थियो। प्रहरीले कार जलेको घटनाबाट सुरु गरेको अनुसन्धानकै क्रममा योजनाबद्ध अपहरण र हत्या भएको खुलासा भएको जनाएको छ।

सुन किनबेचको बहानामा अपहरण

  काठमाडौंस्थित एक आईटी कम्पनीमा कार्यरत शर्मा दशैं–तिहार मनाउन गाउँ पुगेका बेला मामा–भान्जासँग भेट भएका थिए। कुराकानीका क्रममा शर्माले सस्तोमा सुन पाउने भए किन्न इच्छुक रहेको र काठमाडौंका चिनजानका मानिसलाई पनि किनाइदिने प्रस्ताव राखेका थिए। त्यसपछि लोभमा परेका मामा–भान्जाले उनलाई ठगीका बहानामा अपहरण गर्ने योजना बनाए। ९ कात्तिकमा उनीहरूले “सुन गाडेर राखेको छ” भन्दै शर्मालाई अर्जुनधारा–४, दहिझोडा सामुदायिक वनमा बोलाए। शर्मा आफ्नै किया सेल्टस कार लिएर त्यहाँ पुगेका थिए। त्यहाँ पुग्नेबित्तिकै सुनील र राहुलले हथौडाले टाउकोमा प्रहार गरे, जसबाट शर्माको घटनास्थलमै मृत्यु भयो।

शव गाडेर कार जलाए

  हत्या गरेपछि उनीहरूले शव कारमै राखी बिरिङ खोलाको पुलमुनि गाडे। त्यसपछि कारलाई मेचीनगर–१३, निचाझोडा जंगलमा लगेर लुकाए। हत्या छिपाउने प्रयासमा उनीहरूले केही दिन सामान्य व्यवहार गरे। तर, प्रहरीको खोजी सुरु भएपछि १३ कात्तिकको रातमा प्रमाण नष्ट गर्न कार जलाइदिए। कार जलाउँदा सुनीलको हात पोलिएको प्रहरीले जनाएको छ।

चप्पल र मोबाइलले खोले रहस्य

  कार जलेको स्थानमा भेटिएको चप्पल र मोबाइलको कॉल डिटेल्सले घटनाको सुराग दिएको प्रहरीको भनाइ छ। अनुसन्धानमा शर्मा र मामा–भान्जाबीच बारम्बार सम्पर्क भएको पत्ता लागेपछि मोबाइल लोकेसन ट्र्याकिङमार्फत सुनील विराटनगर हुँदै रानी क्षेत्रमा पुगेको पुष्टि भयो। १४ कात्तिकमा कोसी प्रदेश प्रहरी टोलीले सुनीललाई रानी, भारत सीमाबाट पक्राउ गर्‍यो भने त्यसपछि राहुललाई पनि उनको घरमै नियन्त्रणमा लिइयो।

भारतीय नागरिकको संलग्नता

डीएसपी खड्काका अनुसार घटनामा एकजना भारतीय नागरिकको समेत संलग्नता देखिएको छ। “उनी फरार छन्, खोजी जारी छ,” उनले जानकारी दिए।

पक्राउ परेकाविरुद्ध अपहरण र कर्तव्य ज्यान मुद्दा दर्ता गरिएको छ। झापा जिल्ला अदालतबाट सात दिनको म्याद लिएर प्रहरीले थप अनुसन्धान अगाडि बढाएको छ।