बेनी नगरपालिका मौन, जनकल्याण माविमा एसईई प्रमाणपत्रका नाममा आठ हजार असुली

म्याग्दी,कात्तिक २३ 

   म्याग्दीको बेनी नगरपालिका–५ पुलाचौरस्थित जनकल्याण माध्यमिक विद्यालयले एसईई (माध्यमिक शिक्षा परीक्षा) प्रमाणपत्र वितरणका क्रममा विद्यार्थीबाट आठ हजार रुपैयाँभन्दा बढी असुलेको खुलासा भएको छ। सरकारी विद्यालयबाटै यति ठूलो रकम लिइएको थाहा पाएपछि अभिभावक र स्थानीयवासी आक्रोशित भएका छन्। विद्यालयले कात्तिक २० गते विद्यार्थी मनिका बानियाँलाई ४२७ नम्बरको रसिदमार्फत ८,२५० रुपैयाँ “एसईई प्रमाणपत्र शुल्क” शीर्षकमा असुलेको प्रमाण भेटिएको छ। अभिभावकका अनुसार यो केवल एउटा उदाहरण मात्र हो—विद्यालयले विगत एक दशकदेखि नै यस्ता किसिमका शुल्कहरू उठाउँदै आएको छ।

    विद्यालयका शिक्षक–अभिभावक संघका अध्यक्ष बलराम बानियाँले सरकारी विद्यालयले यस्तो चर्को शुल्क लिनु अस्वीकार्य रहेको बताउनुभयो। उहाँले भन्नुभयो, “गरिब तथा विपन्न वर्गका विद्यार्थी पढ्ने सरकारी विद्यालयले प्रमाणपत्रका नाममा यति ठूलो शुल्क लिँदा निजी र सरकारी विद्यालयबीचको भिन्नता नै मेटियो।” अभिभावकहरूले विद्यालय प्रशासनलाई पटक–पटक सचेत गराए पनि अटेरी रवैया देखाएको आरोप लगाएका छन्। स्थानीय जनप्रतिनिधि र सम्बन्धित निकाय भने अहिलेसम्म मौन छन्। अभिभावकहरूले विद्यालयको आर्थिक पारदर्शिताको छानबिन गर्न माग समेत गरेका छन्।

   शिक्षक–अभिभावक संघका अध्यक्ष बानियाँका अनुसार, “प्रमाणपत्र शुल्कबारे विद्यालय व्यवस्थापन समिति र अभिभावकबीच कुनै छलफल भएको थिएन,” जसले विद्यालय प्रशासनको निर्णय प्रक्रियाप्रति पनि प्रश्न उठाएको छ।

   यसैबीच, विद्यालयका प्रधानाध्यापक कमल पौडेलले विद्यालयमा कक्षा ११ र १२ सञ्चालनका लागि आर्थिक अभाव भएकाले शुल्क असुलिएको स्पष्टीकरण दिनुभएको छ। उहाँका अनुसार, विद्यालयमै कक्षा ११–१२ पढ्ने विद्यार्थीबाट ३,२५० रुपैयाँ र अन्य विद्यालयमा जाने विद्यार्थीबाट ८,२५० रुपैयाँ लिने निर्णय विद्यालय व्यवस्थापन समिति र सरोकारवालाबीचको छलफलपछि गरिएको हो।