दैलेखको आठबिस नगरपालिका–८ मा जिप दुर्घटना, १५ जना घाइते

दैलेख,कात्तिक २५

  दैलेख — दैलेखमा शुक्रबार साँझ भएको जिप दुर्घटनामा १५ जना घाइते भएका छन्। कालिकोटबाट सुर्खेततर्फ गइरहेको बोलेरो जिप (भे १ ज १०५६) दैलेखको आठबिस नगरपालिका–८ सेरावाडास्थित कर्णाली राजमार्गमा दुर्घटनाग्रस्त भएको हो। प्रहरीका अनुसार जिप अनियन्त्रित भई सडकबाट करिब ५० मिटर तल खसेको थियो। दुर्घटनामा परेकामध्ये पाँच जनाको अवस्था गम्भीर रहेको जिल्ला प्रहरी कार्यालय दैलेखका सूचना अधिकारी प्रहरी निरीक्षक पुष्पराज रोकायाले जानकारी दिए।

   घाइतेहरूमध्ये केहीको उपचार दैलेख अस्पतालमा भइरहेको छ भने गम्भीर घाइतेलाई सुर्खेतस्थित प्रदेश अस्पतालमा पठाइएको छ। जिपमा चालकसहित १६ जना सवार थिए। दुर्घटनापछि चालक फरार भएका कारण उनको खोजीकार्य जारी रहेको प्रहरीले जनाएको छ। प्रहरीले दुर्घटनाको कारण प्रारम्भिक रूपमा जिपको गति र सडकको मोडलाई मानेको छ। घटनाको थप अनुसन्धान भइरहेको छ।