काठेखोला गाउँपालिका–७ रेश सडकमा कालोपत्र सुरु, पाँच वर्षपछि पूर्वाधार सुधार

 बागलुङ, २४ कात्तिक

   गलकोट (बागलुङ) — पाँच वर्षदेखि रोकिएको काठेखोला गाउँपालिका–७ रेश सडकको कालोपत्र कार्य अखेर सुरु भएको छ। निर्माण व्यवसायीको लापरवाही र बारम्बार म्याद थपिँदा काम स्थगित हुँदै आएको यो सडक अहिले पुनः सक्रिय रूपमा निर्माण भइरहेको हो।

   चार किलोमिटर लम्बाइको उक्त सडक संघीय सरकार र काठेखोला गाउँपालिकाको साझेदारीमा निर्माण थालिएको हो। २०७७ साल जेठमा दुई वर्षमा सम्पन्न गर्ने लक्ष्यसहित जोशीरनिशान आचार्य जेभीसँग ६ करोड ७१ लाख रुपैयाँमा ठेक्का गरिएको थियो। तर सम्झौताअनुसार काम नहुँदा पाँच वर्षमा छ पटक म्याद थपिएको छ।

   कोरोना महामारी, आर्थिक समस्या, भुक्तानीमा ढिलाइ र कच्चा सामग्रीको अभावजस्ता कारण देखाउँदै निर्माण कम्पनीले काम अगाडि बढाएको थिएन। हाल भने ग्राभेलिङ र पूर्वाधार मर्मत कार्य तीव्र गतिमा भइरहेको छ।

   काठेखोला गाउँपालिकाका इञ्जिनियर विनोद लामिछानेका अनुसार एक वर्षदेखि निष्क्रिय ठेकेदार पुनः फिल्डमा फर्केपछि कालोपत्रको तयारी सुरु भएको हो। “पूर्वाधारको धेरै हिस्सा पहिल्यै बनेको थियो, तर ढिलाइका कारण जीर्ण हुन थालेका थिए,” उनले भने। हाल सडकको ७० प्रतिशत भौतिक र ६५ प्रतिशत आर्थिक प्रगति भएको छ।

  उनका अनुसार १४औं खरिद संशोधनलाई आधार मानेर अन्तिम पटक म्याद थप गरिएको हो। “यसपटक कालोपत्रका लागि आवश्यक उपकरण र कच्चा सामग्री तयारी अवस्थामा छन्,” उनले थपे।

  निर्माण व्यवसायी प्रकाश आचार्यले पनि कोरोनाको प्रभाव र भुक्तानीमा समस्या भएको स्वीकार गर्दै अब छिट्टै कालोपत्र कार्य सम्पन्न गर्ने बताएका छन्। “अब कुनै अवरोध छैन, चाँडै सडक पूरा गरेर हस्तान्तरण गर्छौं,” उनले भने।

    यो सडक रेशका बासिन्दासँगै बरेङ–शान्तिपुरका यात्रुहरूको मुख्य मार्गका रूपमा प्रयोग हुँदै आएको छ। कालोपत्र सम्पन्न भएपछि यातायात सहज र सुरक्षित हुने स्थानीयले अपेक्षा गरेका छन्।