मोदी गाउँपालिका–६ दराकमा कागारबाट छुटेको दिनै पतिले गरे श्रीमतीको हत्या

पर्वत ,२५ कार्तिक

    पर्वत — पर्वत जिल्लाको मोदी गाउँपालिका–६ दराकमा एक व्यक्तिले कागार (जेल) बाट छुटेको दिनकै राति आफ्नै श्रीमतीको हत्या गरेका छन्। प्रहरीका अनुसार ५१ वर्षीय जीतबहादुर विकले ५२ वर्षीया पत्नी सीता विकमाथि कुटपिट गरी हत्या गरेका हुन्।

   प्रहरीका अनुसार गए राति घरेलु झगडाका क्रममा जीतबहादुरले श्रीमती सीतालाई कुटपिट गर्दा उनी गम्भीर घाइते भएकी थिइन्। बेहोस अवस्थामा भेटिएकी सीतालाई प्रहरीले उद्धार गरी तत्काल प्रदेश अस्पतालमा पुर्‍याए पनि चिकित्सकले मृत घोषित गरेका थिए। उनको टाउको र अनुहारमा गहिरा चोट लागेको बताइएको छ।

  घटनाबारे जानकारी पाएपछि सीताको बुहारी शोभा विकले प्रहरी चौकी देउपुरमा खबर गरेकी थिइन्। त्यसपछि देउपुर प्रहरी चौकी र जिल्ला प्रहरी कार्यालय पर्वतको संयुक्त टोली घटनास्थल पुगेर जीतबहादुरलाई नियन्त्रणमा लिएको प्रहरीले जनाएको छ। स्थानीयले उनलाई पक्राउ गर्न सहयोग गरेका थिए।

   प्रहरी निरीक्षक सुदीप भण्डारीका अनुसार जीतबहादुर केही दिनअघि वैवाहिक जबर्जस्ती करणी मुद्दामा कैद सजाय भोगिरहेका थिए। उनी सोमबार मात्र धरौटीमा रिहा भएका थिए, र धरौटी रकम उनकी श्रीमती सीताले नै तिरेकी थिइन्।

घर फर्किएको दिन बेलुकी खाना खाइसकेपछि उनकै श्रीमतीमाथि आक्रमण भएको प्रहरीले जनाएको छ। घटनाका बेला घरमा बुहारीसहित चार जना मात्र थिए, उनका तीन छोरा रोजगारीका लागि विदेशमा रहेका छन्।

प्रहरीले घटनाबारे थप अनुसन्धान जारी राखेको जनाएको छ।