बारपाक सुलिकोट र धार्चे गाउँपालिका जोड्ने सडक दुई दिनका लागि बन्द

गोरखा, कात्तिक २५

    गोरखाको बारपाक–लाप्राक सडकखण्डमा स्तरोन्नति कार्यका कारण दुई दिनका लागि सवारी आवागमन बन्द गरिएको छ। बारपाक सुलिकोट गाउँपालिका–१ बारपाक र धार्चे गाउँपालिका–४ लाप्राक जोड्ने सडकमा मङ्गलबार र बुधबार पूर्ण रूपमा यातायात सञ्चालन रोकिएको हो।

   धार्चे गाउँपालिका–४ का वडाध्यक्ष किसान गुरुङका अनुसार सडक स्तरोन्नतिका क्रममा ‘व्याक कटिङ’ र अन्य संरचना निर्माणका कामलाई सहज बनाउन अस्थायी रूपमा सवारी आवागमन बन्द गरिएको हो। उनले भने, “दुई दिनसम्म सडक पूर्ण रूपमा बन्द रहनेछ, त्यसपछि नियमित आवागमन सुचारु गरिनेछ।”

   सडक निर्माणको जिम्मा शर्मा–विक्की जेभी निर्माण कम्पनीले लिएको छ। कम्पनीले तोकिएको अवधिभित्र सडक सुधार कार्य पूरा गर्न अहिले काम तीव्र पारेको जनाएको छ। वडाध्यक्ष गुरुङले बारपाक–लाप्राक हुँदै चल्ने सवारीसाधनलाई वैकल्पिक बाटो प्रयोग गर्न आग्रह गरेका छन्।

  बारपाक र लाप्राक दुबै गन्तव्य गोरखाका प्रमुख पर्यटकीय स्थलका रूपमा परिचित छन्। तर, सडक निर्माणमा ढिलाइका कारण स्थानीय र पर्यटकहरू लामो समयदेखि सास्ती खेप्दै आएका छन्। बर्खायाममा सडक अवरुद्ध हुँदा यातायात महिनौँसम्म ठप्प हुने समस्या दोहोरिँदै आएको छ।

   विसं २०७७ जेठमा ठेक्का सम्झौता गरी २०७९ जेठसम्ममा काम सम्पन्न गर्ने योजना थियो, तर निर्धारित समय गुज्रिसक्दा पनि सडक स्तरोन्नतिको काम पूरा हुन सकेको छैन। अहिलेको बन्दका क्रममा सडक निर्माणलाई तीव्र पारेर समयमै सम्पन्न गर्ने योजना बनाइएको स्थानीय निकायले जनाएको छ।