देशभरका ७५३ पालिकामा एमालेको जनप्रदर्शन: नारा जुलुस र मोटरसाइकल र्‍याली

काठमाडौँ, कात्तिक २५ 

   नेकपा (एमाले) ले आज देशभरका सबै ७५३ वटै स्थानीय पालिकामा व्यापक जनप्रदर्शन गर्दैछ। संसद् विघटनलाई ‘प्रतिगामी कदम’ भन्दै एमालेले त्यसको विरोधमा जनपरिचालन अभियान सुरु गरेको हो।

   एमालेको जनपरिचालन कार्यक्रमअन्तर्गत वडा, पालिका, जिल्ला र राष्ट्रिय तहमा चरणबद्ध रूपमा जनप्रदर्शन गर्ने योजना रहेको छ। पार्टीको प्रचार तथा प्रकाशन विभाग प्रमुख राजेन्द्र गौतमका अनुसार मङ्सिर २२ गते देशका ६ हजार ७ सय ४३ वटै वडामा वडा भेलाहरू सम्पन्न भइसकेका छन्। ती भेलामा भदौ २४ पछि उत्पन्न राजनीतिक घटनाक्रम, संसद् विघटन र पार्टीको आगामी रणनीतिबारे कार्यकर्तालाई जानकारी दिइएको थियो।

  गौतमका अनुसार आजको जनप्रदर्शनअन्तर्गत केही पालिकाहरूमा मोटरसाइकल र्‍यालीमार्फत शक्ति प्रदर्शन गरिँदैछ भने कतिपय ठाउँमा नारा जुलुससहित कोणसभा आयोजना गरिएको छ। “जनतालाई सचेत बनाउने नाराहरू पार्टी केन्द्रले तय गरेको छ,” उनले बताए।

कार्यक्रमलाई भव्य र शान्तिपूर्ण बनाउन एमालेले सहभागीहरूलाई पार्टीको झन्डा सहित सहभागी हुन, जनप्रदर्शनलाई घना बस्ती भएका क्षेत्रमा केन्द्रित गर्न र अन्त्यमा छोटो कोणसभा राख्ने निर्देशन दिएको छ। कोणसभामा स्थानीय नेताहरूले वर्तमान राजनीतिक अवस्थाबारे अभिमत प्रस्तुत गर्नेछन्।

   त्यसैगरी, पार्टीले जनप्रदर्शनका तस्बिर र भिडियोहरू सामाजिक सञ्जालमा शेयर गर्न तथा सञ्चारमाध्यममा पठाउन कार्यकर्तालाई निर्देशन दिएको छ।आजको देशव्यापी प्रदर्शनपछि कात्तिक २९ गते जिल्लास्तरीय आमसभा र मंसिर ६ गते काठमाडौँमा हुने केन्द्रीय जनप्रदर्शनलाई आगामी महाधिवेशनको प्रचार अभियानको रूपमा उपयोग गरिने एमालेले जनाएको छ।