भोटखोला गाउँपालिकामा नेपाल–चीन सीमा स्तम्भ निरीक्षण, सुरक्षा टोलीद्वारा स्थलगत अवलोकन

संखुवासभा, कार्तिक २५ 

    संखुवासभाको उत्तरी भोटखोला गाउँपालिका–१ स्थित किमाथाङ्का नाकास्थित नेपाल–चीन सीमामा रहेका स्तम्भहरूको स्थलगत निरीक्षण गरिएको छ। प्रमुख जिल्ला अधिकारी सिर्जना थपलियाको नेतृत्वमा गएको जिल्ला सुरक्षा टोलीले सीमाक्षेत्रको अवलोकन गर्दै ६८, ६९ र ७० नम्बरका सीमा स्तम्भको निरीक्षण गरेको हो।

    टोलीमा जिल्ला प्रहरी कार्यालयका प्रमुख प्रहरी नायब उपरीक्षक कुमारप्रसाद मैनाली, सशस्त्र प्रहरी बल नेपाल नम्बर ४ अरुण गुल्मका प्रमुख प्रहरी नायब उपरीक्षक बाबुराम पौडेललगायतका सुरक्षाकर्मी सहभागी थिए। प्रमुख जिल्ला अधिकारी थपलियाका अनुसार संखुवासभामा हाल २१ वटा सीमा स्तम्भ रहेका छन्।

   निरीक्षणका क्रममा गत जेठ महिनामा आएको बाढीले भोटखोला–१ स्थित घोङ्गोप्पा र छोकाङ खोलामा रहेको ७१/१ नम्बरको सीमा स्तम्भ बगाएर बेपत्ता बनाएको विषयमा पनि समीक्षा गरिएको थियो। उक्त स्तम्भ अझै फेला परेको छैन। भोटखोला गाउँपालिकाका वडा नम्बर १, २ र ३ सिधै चीनको भूभागसँग जोडिएका छन्।

   सुरक्षा टोलीले सीमा क्षेत्रको अवलोकनसँगै खाँदबारी–किमाथाङ्का सडकखण्डमा पर्ने मतदान स्थल, बोर्डर आउट पोस्ट (बीओपी) किमाथाङ्का, प्रहरी चौकीहरू तथा भन्सार कार्यालयको जग्गा नापजाँच र चारकिल्ला निर्धारणसमेत गरेको थियो।

त्यस क्रममा चीनतर्फका समकक्षीसँग सीमा सुरक्षा, सीमापार अपराध नियन्त्रण, विपद् व्यवस्थापन तथा सूचना आदानप्रदानबारे छलफल गरिएको प्रमुख जिल्ला अधिकारी थपलियाले बताइन्।

   साथै टोलीले किमाथाङ्का अरुण, माथिल्लो अरुण र अरुण तेस्रो जलविद्युत् आयोजना क्षेत्रहरूको स्थलगत अनुगमन पनि गरेको थियो। निरीक्षणका क्रममा मुआब्जा प्रक्रिया, नागरिक सुनुवाइ, सडक अवस्था, शान्ति–सुरक्षा र स्थानीय सरोकारका विषयमा समेत छलफल गरिएको थियो।

जिल्ला प्रशासनका अनुसार यस्ता नियमित निरीक्षणले सीमाक्षेत्रको सुरक्षा, समन्वय र आपसी विश्वास सुदृढ गर्न सहयोग पुग्ने विश्वास लिइएको छ।