इनरुवा नगरपालिकाले राजाजी हिडिबार बाबा ग्रामथानमा मण्डप र धर्मशालाको उद्घाटन गर्‍यो

इनरुवा, कात्तिक २७

    सुनसरीको इनरुवा नगरपालिका–९, बबिया जमुवास्थित ऐतिहासिक धार्मिकस्थल राजाजी हिडिबार बाबा ग्रामथान परिसरमा नव–निर्मित मण्डप र धर्मशालाको एक साथ उद्घाटन गरिएको छ। सदियौँ पुरानो धार्मिक आस्था र संस्कृतिको प्रतीक मानिने ग्रामथान परिसरमा निर्माण गरिएको अष्ट्याम मण्डप र धर्मशालाको उद्घाटन इनरुवा नगरपालिकाका प्रमुख केदार भण्डारी र कोशी प्रदेशसभा सदस्य रामप्रसाद मेहताले संयुक्त रूपमा गरे।

   उद्घाटन समारोहपूर्व स्थानीय श्रद्धालुहरूले सयौँको सहभागितामा भव्य कलश यात्रा आयोजना गरेका थिए। भक्तजनहरूको उत्साहजनक उपस्थितिमा सम्पन्न कार्यक्रममा धार्मिक सहअस्तित्व र स्थानीय एकताको झल्को देखिएको थियो। स्थानीय समाजसेवी तथा प्रधानाध्यापक शिवनन्दन मेहताका अनुसार, नयाँ मण्डप धार्मिक कार्यक्रम, पूजा–पाठ र सामुदायिक गतिविधिका लागि उपयोगी हुने अपेक्षा गरिएको छ, भने धर्मशालाले टाढाबाट आउने भक्तजनलाई बसोबासको सुविधा उपलब्ध गराउनेछ।

   कार्यक्रममा बोल्दै प्रदेशसभा सदस्य रामप्रसाद मेहताले राजाजी डिहिबार बाबा ग्रामथान हिन्दू धर्मावलम्बीहरूको आस्थाको केन्द्र भए पनि यहाँका मुस्लिम समुदायले समेत सहयोग र सहभागिता जनाएका कारण यस स्थानले धार्मिक एकता र सहिष्णुताको उदाहरण प्रस्तुत गरेको बताए।

उद्घाटन समारोहमा इनरुवा–५ का वडाध्यक्ष अनिल पोखरेल, अपन स्वर्ग नेपाल कला संस्कृतिका केन्द्रीय अध्यक्ष झोटन मेहता, स्थानीय अगुवाहरू, समाजसेवी, तथा भक्तजनहरूको उल्लेख्य उपस्थिति थियो।

  स्थानीयहरूले मण्डप र धर्मशालाको निर्माणलाई धार्मिक पर्यटन प्रवर्द्धन र सांस्कृतिक सम्पदाको संरक्षणतर्फको महत्वपूर्ण कदमका रूपमा लिएका छन्।