संखुवासभा,जिल्लाको भोटखोला गाउँपालिका(४)मा पहिरो जाँदा पाँच घरपरिवार विस्थापित भएका छन्।

संखुवासभा, साउन ७ गते – भोटखोला गाउँपालिका स्थित जिजिङ्ग्खा टोलमा मंगलबार राति आएको भीषण पहिरोका कारण पाँच घरपरिवार विस्थापित भएका छन्। गाउँपालिका अध्यक्ष वाङ्छेदर भोटेका अनुसार, ढुंगा, माटो र ठूलो ढिस्कोसहित आएको पहिरोले एक घर पूर्ण रूपमा भत्काएको छ भने अर्को घर आंशिक रूपमा क्षतिग्रस्त भएको छ। बाँकी तीन घरहरू उच्च जोखिममा परेका कारण ती परिवारहरू पूर्णरूपमा विस्थापित भएका छन्।

     पीडितहरूलाई तत्काल स्थानीय युवा, स्याक्सिला गोला प्रहरी चौकी र गाउँपालिका अध्यक्षको समन्वयमा सुरक्षित स्थानमा सारिएको छ। हाल उनीहरू अस्थायी बसोबासमा रहेका छन् र पुनर्स्थापना कार्य सुरु भइसकेको गाउँपालिकाले जनाएको छ। गाउँपालिकाले थप क्षति रोक्नका लागि पहिरो प्रभावित क्षेत्रहरूमा सावधानी अपनाउन सबैलाई अनुरोध गरेको छ।