शुक्लाफाँटा नगरपालिकामा १५ वर्षको मेहनतले डेरी उद्योग फस्टायो

कञ्चनपुर,३० कार्तिक

  कञ्चनपुर — शुक्लाफाँटा नगरपालिका–१२ कालागौडीका शिवचरण रानाले १५ वर्षअघि साइकलमा दुई लिटर दूध बोकेर सुरु गरेको यात्राले अहिले गाउँमै आधुनिक डेरी उद्योगको रूप लिएको छ। भारतका विभिन्न सहरमा मजदुरी र चौकीदारी गर्दै ६ वर्ष बसेपछि गाउँ फर्केका रानाले स्वदेशमै केही गर्ने मनसुबाले दूध संकलन व्यवसाय सुरु गरेका थिए।

  सहकारीबाट ऋण लिएर किनेको साइकलमै गाउँभरि दूध संकलन गर्दै डेरीमा पुयाउने उनले पाँच वर्षपछि मोटरसाइकल किने। दैनिक २००–३०० लिटर दूध संकलनबाट सुरु भएको व्यवसाय अहिले १५ सय लिटर ठूलो संकलन केन्द्रमा बदलिएको छ।

  रानाले अहिले कालागौडीमै आफ्नो डेरी सञ्चालन गरिरहेका छन्। डेरीमा दुई–तीन सय लिटर दूध दैनिक खपत हुन्छ भने बाँकी झलारी र धनगढीमा बिक्री गरिन्छ। गाउँमा प्रतिलिटर ५५ देखि ६८ रुपैयाँमा दूध किन्ने र बझारमा १५ रुपैयाँसम्म नाफा रहने उनले बताए।
“अहिले महिनामा एकदेखि डेढ लाख रुपैयाँसम्म कमाइ हुन्छ,” रानाले भने, “सुरुमा निकै गाह्रो थियो, तर निरन्तरताले व्यवसाय अगाडि बढ्यो।”

  डेरी सञ्चालनमा उनका छोरा पनि सहयोग गर्छन्। घरमै भैंसी पालेका रानाले ६ जना कामदार राखेर दूध संकलनदेखि उत्पादन र ढुवानीसम्मका काम व्यवस्थापन गरेका छन्।

उनको डेरीले दही, मोही, घ्यू, पनिर, मिठाईलगायतका परिकार पनि उत्पादन र बिक्री गर्दै आएको छ। गर्मीमा र विवाह–उत्सवको समयमा गाउँमै दूधको माग अत्यधिक हुने भएकाले कहिलेकाहीँ माग धान्नै नसक्ने अवस्था आउने राना बताउँछन्।

  भारतमा सीप सिकेर फर्किएका रानाले गाउँमै रोजगारी, सेवा र उत्पादनको नयाँ सम्भावना देखाइदिएका छन्।