मिथिला नगरपालिकामा कार दुर्घटनास् एकको मृत्यु, एक गम्भीर घाइते

ढल्केबर,मंसिर ७

    धनुषाको मिथिला नगरपालिका–२, हजरा चौकस्थित जनकपुर–ढल्केबर सडकखण्डमा आइतबार बिहान भएको सडक दुर्घटनामा एक महिलाको मृत्यु भएको छ भने उनका श्रीमान् गम्भीर घाइते भएका छन्।

    इलाका प्रहरी कार्यालय महेन्द्रनगरका अनुसार मिथिला नगरपालिका–१, लक्ष्मीनिवास निवासी ६० वर्षीय राजकुमार महतो साइकलमा सवार रहँदा कारले ठक्कर दिँदा गम्भीर घाइते भएका हुन्। सोही दुर्घटनामा उनकी ५५ वर्षीया पत्नी सुमित्रा देवी महतोको घटनास्थलमै मृत्यु भएको छ।

    प्रारम्भिक अनुसन्धानअनुसार बागमती प्रदेश ०१–०३१ च २०३६ नम्बरको कारले सडक पार गर्न खोजिरहेका दम्पत्तिलाई ठक्कर दिएको देखिएको छ। दुर्घटनापछि स्थानीयवासी र प्रहरी टोलीले घाइते राजकुमार महतोलाई तत्काल उद्धार गरी जनकपुरस्थित प्रादेशिक अस्पतालमा उपचारका लागि पठाएका छन्।

  प्रहरीले ठक्कर दिने कार र चालकलाई नियन्त्रणमा लिएर थप अनुसन्धान अघि बढाएको जनाएको छ।