शम्भुनाथ नगरपालिका–१ मा क्रिकेट खेलेर फर्किएका भाइको मृत्यु, दाजु उपचारमा

सप्तरी, मंसिर ७ 

  सप्तरीको शम्भुनाथ नगरपालिका–१ मा शनिबार दिउँसो खेल मैदानमा क्रिकेट खेलेर घर फर्किएका दाजुभाइमध्ये भाइको मृत्यु भएको छ भने दाजु बेहोस भई अस्पतालमा उपचाररत छन्।

  १३ वर्षीय राकेश यादव घर फर्के लगत्तै बेहोस भई ढलेका थिए। तत्कालै उनको मृत्यु भएको बुवा किसुनदेव यादवले जानकारी दिए। उनका १६ वर्षीय दाजु रुपेश यादव पनि बेहोस भएपछि लहानस्थित एक अस्पतालमा भर्ना गरिएको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले बताए।

  मृत्युको कारण अझै स्पष्ट नभएको प्रहरीले जनाएको छ। प्रारम्भिक अनुमानअनुसार खेल मैदानको छेउमा रहेको झारपातमा विषालु सर्पले डसेको वा घर फर्किने क्रममा विषादीयुक्त खानेकुरा सेवन भएको हुन सक्ने आशंका गरिएको छ।

प्रहरीले घटनाबारे थप अनुसन्धान सुरु गरेको छ। मृत्युको वास्तविक कारण भने पोस्टमार्टम रिपोर्टपछि मात्र खुल्ने बताइएको छ।