बर्दघाट–पुनर्वास पालिकामा कार्यालय प्रमुखमाथि हमला, काम ठप्प

पश्चिम नवलपरासी, २८ मङ्सिर 

  पश्चिम नवलपरासीको बर्दघाट नगरपालिका–पुनर्वासमा रहेको राष्ट्रिय आवास कम्पनीको योजना कार्यालयमा आइतबारदेखि सम्पूर्ण कामकाज ठप्प भएको छ। कार्यालय प्रमुखमाथि भएको दुर्व्यवहारका दोषीलाई लामो समय बितिसक्दा पनि पक्राउ नगरिएको भन्दै कर्मचारीहरूले सुरक्षाको सुनिश्चितता नभएसम्म काम नगर्ने घोषणा गरेका हुन्।

    कार्यालयका योजना प्रमुख महेन्द्र थापामाथि गत मङ्सिर २१ गते दुर्व्यवहार भएको घटनामा संलग्न व्यक्तिहरू अहिलेसम्म पक्राउ नपरेको भन्दै कर्मचारी आन्दोलित बनेका छन्। उनीहरूले प्रहरी प्रशासनबाट पर्याप्त सुरक्षा र दोषीमाथि कानुनी कारबाहीको माग गरेका छन्। सङ्घीय सरकार अन्तर्गत सहरी विकास मन्त्रालय मातहत रहेको राष्ट्रिय आवास कम्पनी नेपाल सरकारको स्वामित्वमा रहेको संस्था हो। तर, कार्यालय प्रमुखमाथि भएको घटनापछि कार्यालयको नियमित सेवा पूर्ण रूपमा अवरुद्ध भएको छ।

   घटनाका क्रममा नेपाल कम्युनिष्ट पार्टी (बहुमत) निकट कम्युनिष्ट युवा सङ्गठनका कार्यकर्ताले कार्यालय प्रमुख थापामाथि कालोमोसो दल्दै विभिन्न आरोप लगाएका थिए। पार्टीले जारी गरेको विज्ञप्तिमा राष्ट्रिय आवास कम्पनीको जग्गा बिक्रीमा अनियमितता र भ्रष्टाचार गरिएको दाबी गरिएको थियो। विज्ञप्तिमा चिसापानी क्षेत्रको जग्गा बिक्री, अभिलेख व्यवस्थापन, घुस माग लगायतका विषय समेटिएका थिए।

    तर, कार्यालय प्रमुख थापाले आफूमाथि लगाइएका सबै आरोप अस्वीकार गर्नुभएको छ। उहाँले चिसापानीको जग्गा सर्वोच्च अदालतको आदेशअनुसार नै व्यक्तिको नाममा गएको स्पष्ट पार्दै आफूले कुनै पनि आर्थिक अनियमितता नगरेको दाबी गर्नुभयो। आफन्तलाई जागिर दिएको आरोप पनि आधारहीन रहेको उहाँको भनाइ छ।

    कर्मचारीहरूले घटनामा संलग्नलाई तत्काल पक्राउ गरी कारबाही गर्नुपर्ने माग गर्दै शान्ति सुरक्षाको प्रत्याभूति नभएसम्म आन्दोलन जारी रहने बताएका छन्। कार्यालयमा काम ठप्प हुँदा स्थानीय तहबाट आएका सिफारिसका कागजात, मालपोत कार्यालयसम्बन्धी प्रक्रिया लगायत अत्यावश्यक सेवाहरू प्रभावित भएका छन्।