पुतलीबजार नगरपालिकामा राष्ट्रपति रनिङ शिल्ड उपाधि रोशनी माविलाई तेस्रो पटक

 स्याङ्जा, २८ मङ्सिर   

    पुतलीबजार नगरपालिकाले आयोजना गरेको आठौं राष्ट्रपति रनिङ शिल्ड प्रतियोगितामा रोशनी आवासीय माध्यमिक विद्यालयले लगातार तेस्रो पटक उपाधि जितेको छ। रोशनी माविले १९ स्वर्ण, तीन रजत र चार कास्य पदक हात पार्दै उपाधिसहित नगद पुरस्कार, रनिङ शिल्ड, ट्रफी, मेडल र प्रमाणपत्र प्राप्त गरेको छ। यसैगरी, रनिङ शिल्ड कब्जा पनि रोशनी माविले गरेको छ।

   वडा नं. ६ को हिमालय माध्यमिक विद्यालयले पाँच स्वर्ण र एक रजत पदकसहित दोस्रो स्थान हासिल गरेको छ। स्याङ्जा माध्यमिक विद्यालयले दुई स्वर्ण, पाँच रजत र तीन कास्य पदकसहित तेस्रो स्थान प्राप्त गरेको शिक्षा प्रमुख बाबुराम बरालले जानकारी दिनुभयो। विजेतालाई नगद पुरस्कारसहित ट्रफी, मेडल र प्रमाणपत्र प्रदान गरिएको थियो। मालेबगर खेलमैदानमा आयोजित प्रतियोगितामा भलिबल, एथलेटिक्स, ट्रिपल जम्प, लङ जम्प, हाई जम्प, ज्याभलिन थ्रो, सटपुट, कबड्डी लगायतका खेल समावेश गरिएको थियो।

  प्रतिस्पर्धामा २४ विद्यालयका करिब १,२८० विद्यार्थी सहभागी भए भने तीस स्वर्ण पदकका लागि भिडन्त भएको थियो। पुतलीबजार नगरपालिकाका नगर प्रमुख तुलसीराम रेग्मीले पुरस्कार वितरण गर्दै खेलकुदले विद्यार्थीमा आत्मविश्वास, नेतृत्व क्षमता र अनुशासन विकास गर्न महत्वपूर्ण भूमिका खेल्ने बताए।