गोसाइँकुण्ड गाउँपालिकामा रसुवागढी नाका पुनः सञ्चालन

रसुवार, पुस १४

   करिब छ महिनादेखि बन्द रहेको नेपाल–चीन सीमावर्ती रसुवागढी नाका आइतबारदेखि पुनः सञ्चालनमा आएको छ। गत असार २४ गतेको बाढीले क्षतिग्रस्त बनाएको गोसाइँकुण्ड गाउँपालिका–२ स्थित मितेरी पुलको पुनर्निर्माण सम्पन्न भएपछि नाका आंशिक रूपमा खुलाइएको हो।

    रसुवाका प्रमुख जिल्ला अधिकारी राजेश पन्थीका अनुसार सीमापार ढुवानीमा संलग्न नेपाली ट्रकचालकहरू बिहान ७ बजेदेखि केरुङतर्फ जान थालेका छन्। ल्हेन्द्रे खोलामा निर्माण गरिएको बेलिब्रिजको प्राविधिक परीक्षण सफल भएपछि नाका पुनः सञ्चालन गर्ने निर्णय गरिएको उहाँले जानकारी दिनुभयो। रसुवा भन्सार कार्यालयका प्रमुख तुलसीप्रसाद भट्टराईले पुरानो मितेरी पुलको स्थानमा नयाँ बेलिब्रिज निर्माण भइसकेको र आइतबारदेखि मानिसको आवतजावत सुरु भएको बताउनुभयो। आगामी पुस १७ गतेदेखि भने मालवाहक सवारीसाधन र व्यापारीलाई समेत आवागमनको अनुमति दिइने छ।

   चिनियाँ पक्षले जारी गरेको सूचनाअनुसार सीमापार ढुवानीमा संलग्न व्यक्ति आइतबारदेखि प्रवेश गर्न सक्नेछन्। साथै, व्यापारिक प्रतिष्ठानले सम्बन्धित निकायलाई समयमै जानकारी गराउनुपर्ने र नेपाली चालक तथा कर्मचारीले आवश्यक कागजी प्रक्रिया र सवारीसाधन तयारी पूरा गर्नुपर्ने उल्लेख गरिएको छ। यसैबीच, असारमा केरुङतर्फ पठाइएका मालवाहक कन्टेनर व्यवस्थापनका लागि व्यवसायीका प्रतिनिधि केरुङ पुगेका छन्। सीमा प्रहरी चौकी टिमुरेका प्रहरी निरीक्षक विक्रम कुँवरका अनुसार बिहीबारदेखि भन्सार कार्यालयले निरीक्षणपछि मात्र सवारीसाधन आवागमनको अनुमति दिने व्यवस्था मिलाइएको छ। यस अवधिमा एकतर्फी पालैपालो प्रणाली कडाइका साथ लागू गरिने जनाइएको छ।

    जी–२१६ सीमाक्षेत्रमा सडक कालोपत्रेको काम जारी रहेकाले जनवरी १ देखि ८ सम्म आधा मार्ग मात्र प्रयोग गरी आवागमन सञ्चालन गरिनेछ। यस अवधिमा चिनियाँ समय अनुसार बिहान ९ बजेदेखि दिउँसो २ बजेसम्म सीमापार आवागमन खुला रहनेछ। जनवरी ८ पछि भने बिहान ९ देखि दिउँसो १ बजेसम्म नियमित समयभन्दा एक घण्टा बढी सवारीसाधन प्रवेश गर्न पाउनेछन् भने दिउँसो २ देखि साँझ ७ बजेसम्म अस्थायी रूपमा आवागमन सञ्चालन गरिनेछ।

   यसअघि विसं २०७६ जेठमा सञ्चालनमा आएको मितेरी पुल गत असारको बाढीले बगाएपछि नेपाल–चीन सडक सम्पर्क पूर्ण रूपमा विच्छेद भएको थियो। चिनियाँ लगानीमा निर्माण भएको उक्त पुल वर्षायाममा ल्हेन्द्रे खोलामा आउने बाढीका कारण पटक–पटक क्षतिग्रस्त हुँदै आएको छ।