आँबुखैरहनी गाउँपालिकामा त्रिशूली किनारमा बसको अवशेष फेला

चितवन ,२७ पुष

    तनहुँको आँबुखैरहनी गाउँपालिका–५, द्वोन्द्राङ बेँसीस्थित त्रिशूली नदी किनारमा सवारी साधनका अवशेष फेला परेका छन्। ती अवशेष गत वर्ष सिमलतालबाट पहिरोसहित त्रिशूलीमा खसेर बेपत्ता भएका दुई बसमध्ये एउटाको हुनसक्ने आशंका गरिएको छ।

    इलाका प्रहरी कार्यालय मुग्लिनका प्रमुख प्रहरी निरीक्षक प्रतीक सिंहका अनुसार स्थानीयवासीले बालुवामा पुरिएको अवस्थामा सवारी साधनका पाटपुर्जा देखेपछि प्रहरीलाई जानकारी गराएका थिए। सूचनापछि प्रहरी टोली घटनास्थलमा पुगेर अवशेष निकाल्ने काम भइरहेको छ। फेला परेका पाटपुर्जा बस बेपत्ता भएको स्थान सिमलतालबाट करिब २०० मिटर तल, तनहुँतर्फ रहेको बताइएको छ। प्रहरीका अनुसार अवशेष भेटिएको स्थान जलबिरेबाट करिब आठ किलोमिटर पश्चिम पर्छ।

    २०७८ असार २८ गते नारायणगढ–मुग्लिन सडकखण्ड अन्तर्गत सिमलतालमा आएको पहिरोसँगै दुई वटा यात्रुबाहक बस त्रिशूली नदीमा खसेर बेपत्ता भएका थिए। ती बसको खोजी कार्य लामो समयदेखि जारी रहँदै आएको छ।