सिद्धकुमाख गाउँपालिका–२ टाकुराका नौ जनाको भारतमा मृत्यु

सल्यान, पुस २९ 

    भारतको हिमाचल प्रदेशस्थित अर्की क्षेत्रमा भएको ग्यास सिलिन्डर विस्फोटमा नौ जना नेपालीको ज्यान गएको छ। मृत्यु हुने सबै सल्यान जिल्लाको सिद्धकुमाख गाउँपालिका–२ टाकुराका दुई परिवारका सदस्य भएको पारिवारिक स्रोतले जनाएको छ। सोमबार राति करिब २ बजेतिर उनीहरू सुतिरहेको कोठाभित्र राखिएको ग्यास सिलिन्डर अचानक विस्फोट हुँदा भीषण आगलागी भएको थियो। विस्फोटसँगै आगो फैलिँदा वरपरका केही घरसमेत जलेर पूर्ण रूपमा ध्वस्त भएका छन्। घटनास्थलमै नौ जनाको ज्यान गएको बताइएको छ।

    सिद्धकुमाख गाउँपालिका–२ का वडा सदस्य लक्ष्मी विकका अनुसार दुर्घटनामा ज्यान गुमाउनेहरूमा ३३ वर्षीय धनबहादुर विक, उहाँकी ३२ वर्षीया श्रीमती कविता विक, १६ वर्षीया छोरी राधा विक, १० वर्षीया छोरी रेणुका विक र २२ महिनाका छोरा राजन विक रहेका छन्। त्यस्तै, अर्को परिवारका ४६ वर्षीय काशीराम विक, उहाँकी ३२ वर्षीया श्रीमती टीका विक, ११ वर्षीया छोरी अनु विक र ७ वर्षीय छोरा किरण विकको पनि मृत्यु भएको छ।

   उनीहरू करिब दुई वर्षदेखि रोजगारीका सिलसिलामा भारतमा बस्दै आएका थिए र स्थानीय क्षेत्रमा मजदुरी गर्दै जीवनयापन गरिरहेका थिए। स्थानीय स्रोतका अनुसार उनीहरू बसोबास गरिरहेको कोठामै ग्यास सिलिन्डर राखिएको थियो, जसबाट दुर्घटना भएको प्रारम्भिक अनुमान गरिएको छ। हालसम्म पाँच जनाको शव फेला परेको र बाँकी शवको खोजी कार्य जारी रहेको जनाइएको छ। विस्फोटको तीव्रताका कारण शवहरू तितरबितर भएकाले सबैको पहिचान प्रक्रिया पूरा हुन सकेको छैन। घटनास्थलमा भारतीय स्थानीय प्रशासन तथा सुरक्षाकर्मीले उद्धार र अनुसन्धान कार्य तीव्र पारेका छन्।

     एकै गाउँका नौ जनाको एकैपटक ज्यान गएपछि सिद्धकुमाख गाउँपालिका–२ शोकमा डुबेको छ। गाउँभरि शोकको वातावरण छाएको छ भने आफन्त र छिमेकीहरू गहिरो पीडामा छन्।