टेम्केमैयुङ गाउँपालिकामा महिलालाई तरकारी खेती तालिम र टनेल सहयोग

भोजपुर, पुस २८ 

     भोजपुरको टेम्केमैयुङ गाउँपालिका–१ तिम्मामा महिलालाई उद्यमशील बनाउँदै आर्थिक रूपमा सबल बनाउने उद्देश्यले व्यावसायिक तरकारी खेतीसम्बन्धी पाँचदिने तालिम सञ्चालन गरिएको छ। स्थानीय स्तरमै रोजगारी सिर्जना गर्ने र महिलाको आयआर्जन बढाउने लक्ष्यसहित तालिम आयोजना गरिएको हो।

    परम्परागत कृषिलाई आधुनिक र व्यावसायिक प्रणालीतर्फ उन्मुख गराउने उद्देश्यले तालिम दिइएको आयोजकले जनाएको छ। तालिमका क्रममा सहभागी महिलालाई मौसमअनुसार उपयुक्त तरकारी छनोट, उन्नत खेती प्रविधि, प्लास्टिक टनेल निर्माण र टनेलभित्र तरकारी उत्पादन गर्ने तरिका, जैविक मल तथा विषादी बनाउने विधि, बीउ–बिजनको ब्याड तयारी, सिँचाइ व्यवस्थापन तथा रोग–किरा नियन्त्रणका विषयमा व्यावहारिक ज्ञान प्रदान गरिएको छ।

   वडाअध्यक्ष नरबहादुर राईका अनुसार महिलालाई सीपमूलक तालिममार्फत उद्यममा जोड्ने उद्देश्यले कार्यक्रम सञ्चालन गरिएको हो। उहाँले तालिममा सहभागी २५ जना महिलालाई आवश्यक बीउ–बिजनसहित ८५ प्रतिशत अनुदानमा एक–एक थान प्लास्टिक टनेल वितरण गरिएको जानकारी दिनुभयो। “महिलालाई कृषि उद्यममा आत्मनिर्भर बनाउने लक्ष्यसहित यो कार्यक्रम ल्याएका हौँ,” उहाँले भन्नुभयो, “अब उनीहरूले आफ्नै खेतबारीमा व्यावसायिक तरकारी खेती गरेर नियमित आम्दानी गर्न सक्नेछन्।”

    तालिममा सहभागी महिलाहरूले सिकेका सीप व्यवहारमा उतार्दै सामूहिक र व्यक्तिगत रूपमा तरकारी खेती गर्ने प्रतिबद्धता जनाएका छन्। यसले बाहिरबाट आयात हुने तरकारीमा निर्भरता घटाउने र स्थानीय बजारमा ताजा तथा गुणस्तरीय तरकारीको आपूर्ति बढाउने विश्वास उनीहरूले व्यक्त गरेका छन्।