भोजपुर नगरपालिकामा सुन्तलाका बोट सुक्न थालेपछि किसान समस्यामा

भोजपुर, माघ १९ 

  भोजपुर जिल्लामा सुन्तलाका बोट क्रमशः सुक्न थालेपछि यहाँका किसान गम्भीर समस्यामा परेका छन् । विभिन्न रोगको प्रकोपका कारण सुन्तला बगान नै नष्ट हुने जोखिम बढ्दै गएपछि किसानको जीविकोपार्जनमा प्रत्यक्ष असर परेको छ ।

   वर्षौँको मेहनतपछि हुर्काइएका सुन्तलाका बोट सुक्दै जान थालेपछि किसान चिन्तित बनेका हुन् । भोजपुर नगरपालिका–६ का किसान सोवित आछामेका अनुसार बगानमा ऐजरु पलाउने, हाँगा सुक्ने, फल नलाग्ने, फल झर्ने तथा पात पहेँलो हुँदै अन्ततः बोट नै मर्ने समस्या देखिएको छ । यसका कारण उत्पादनमा उल्लेख्य गिरावट आएको र केही स्थानमा पूरै बगान नष्ट हुने अवस्थामा पुगेको उहाँले बताउनुभयो ।

     समयमै प्राविधिक सहयोग नपाउनु र रोगको उचित उपचार नहुँदा समस्या झन् जटिल बन्दै गएको किसानको गुनासो छ । बोट सुक्न थालेपछि बाध्य भएर काटेर फाल्नुपरेको आछामेले जानकारी दिनुभयो । “सम्बन्धित सरकारी निकायले सुन्तलामा देखिएको रोगको पहिचान गरी तत्काल समाधानको व्यवस्था गर्नुपर्छ,” उहाँले भन्नुभयो, “बगानै सखाप हुने अवस्था आएपछि किसान अत्यन्तै पीडामा छन्।”