दार्चुला पालिकामा नेमकिपाका रावलद्वारा पहिलो मनोनयन दर्ता

दार्चुला, माघ ६ 

  आगामी फागुन २१ गते हुने प्रतिनिधिसभा सदस्य निर्वाचनका लागि दार्चुलामा पहिलो मनोनयन पत्र दर्ता भएको छ । देशभरका १६५ निर्वाचन क्षेत्रमा एकैसाथ सुरु भएको उम्मेदवारी दर्ता प्रक्रियाअन्तर्गत दार्चुलामा नेपाल मजदुर किसान पार्टी  (नेमकिपा)  का उम्मेदवारले सबैभन्दा पहिला मनोनयन दर्ता गराउनु भएको हो ।

    मुख्य निर्वाचन अधिकृत तथा जिल्ला न्यायाधीश भुवन गिरीका अनुसार मङ्गलबार बिहान ११ः३० बजे नेमकिपाका रमेशकुमार रावलले प्रतिनिधिसभा सदस्यका लागि प्रत्यक्षतर्फ आफ्नो मनोनयन दर्ता गराउनुभएको हो । उहाँ कैलाली जिल्लाको लम्कीचुहा नगरपालिका–५ का स्थायी बासिन्दा हुनुहुन्छ । निर्वाचन तालिकाअनुसार उम्मेदवारी दर्ता, जाँच तथा नाम फिर्ताको प्रक्रिया सम्पन्न भएपछि निर्वाचन गतिविधि थप तीव्र हुने निर्वाचन कार्यालयले जनाएको छ ।