अमरगढी नगरपालिकामा बाँदरको क्षति न्यूनीकरणका लागि हिउँदे फलफूल कलमी कार्यक्रम

डडेल्धुरा, माघ १५ 

    डडेल्धुराको अमरगढी नगरपालिका–२ मा हिउँदे फलफूल बोटबिरुवा कलमी कार्यक्रम सञ्चालन गरिएको छ । कृषि ज्ञान केन्द्र डडेल्धुराको आयोजनामा गरिएको यस कार्यक्रमले जंगली क्षेत्रको प्रभावकारी सदुपयोग गर्दै फलफूल उत्पादन बढाउने र बाँदरका कारण किसानले भोग्दै आएको क्षति न्यूनीकरण गर्ने लक्ष्य लिएको छ । कार्यक्रमअन्तर्गत जंगलमा प्राकृतिक रूपमा हुर्किएका ‘मेल’ जातका बोटमा नास्पातीका कलमी लगाइएको छ । कृषि ज्ञान केन्द्र डडेल्धुराका प्रमुख नरेन्द्र पनेरुका अनुसार जंगली बोटमा फलफूल कलमी गर्दा दोहोरो फाइदा हुने अपेक्षा गरिएको छ ।

     “एकातिर स्थानीयवासीले नास्पाती जस्ता फलफूल सहजै उपभोग गर्न पाउँछन् भने अर्कोतिर बाँदरका लागि जंगलमै पर्याप्त खानेकुरा उपलब्ध हुन्छ,” उनले भने, “जंगलमै फलफूल पाइएपछि बाँदर खेतबारीमा पस्ने क्रम घट्ने र मकै, आलु, तरकारीलगायत बालीमा हुने क्षति उल्लेखनीय रूपमा कम हुने विश्वास छ।” डडेल्धुरासहित सुदूरपश्चिमका पहाडी जिल्लामा पछिल्ला वर्षहरूमा बाँदरको समस्या झन् जटिल बन्दै गएको छ । बस्ती नजिकका खेतबारीमा बाँदर पसेर केही समयमै किसानको मेहनत नष्ट गर्ने गरेको छ । बारम्बार हुने क्षतिका कारण कतिपय किसानले खेती नै छाड्न थालेको अवस्था छ ।

    यस्तो समस्याको दीर्घकालीन समाधानका लागि जंगली क्षेत्रमा फलफूलका बोटबिरुवा विस्तार गर्नु उपयुक्त उपाय हुन सक्ने कृषि ज्ञान केन्द्रको ठहर छ । केन्द्रले आगामी दिनमा जिल्लाका विभिन्न स्थानमा हिउँदे फलफूल कलमी कार्यक्रमलाई चरणबद्ध रूपमा विस्तार गर्दै लैजाने जनाएको छ ।