तिलोत्तमा नगरपालिकाको सहकारीमा ८० करोडको शंकास्पद कारोबार, ३७ करोड अपचलन

   तिलोत्तमा नगरपालिका–३ स्थित डिंगरनगर दूरगामी बहुउद्देश्यीय सहकारी संस्थामा ८० करोडको शंकास्पद कारोबार र ३७ करोडभन्दा बढी अपचलन भएको खुलासा भएको छ। सहकारीका अध्यक्ष, सचिव र व्यवस्थापकको मिलेमतोमा २५ करोड बढी रकम अपरिचित व्यक्तिलाई ऋणको रूपमा लगानी गरिएको र १२ करोड रकम हिनामिना गरेको पाइएको छ। सहकारीको सफ्टवेयरमा १३ हजार पटक ‘ऋण विवरण इन्ट्री र डिलिट गरिएको र थुप्रै ऋण बिना धितो वा मूल्याङ्कनका व्यक्तिलाई प्रवाह गरिएको पाइएको छ।

  ८० करोडको कारोबारको ४३ करोड बिना सेवा शुल्क प्रवाह गरिएको छ।सहकारीका अध्यक्ष घनश्याम तिवारी र सचिव रामबहादुर थापा फरार छन्, जबकि व्यवस्थापक वसन्त पराजुलीलाई प्रहरीले पक्राउ गरेको छ। अध्यक्ष र सचिवका श्रीमतीलाई बचतकर्ताले नियन्त्रणमा लिएका छन्।प्रहरीले फरार रहेका अध्यक्ष र सचिवको खोजी जारी राखेको छ र लेखा परीक्षण रिपोर्टका आधारमा थप अनुसन्धान गर्ने जनाएको छ।