चन्द्रकोट गाउँपालिकामा पहिरोको प्रकोप: दिव्रुङ्ग स्वास्थ्यचौकी र सडक मार्ग अवरुद्ध

  गुल्मी जिल्लाको चन्द्रकोट गाउँपालिका–१ स्थित दिव्रुङ्ग स्वास्थ्यचौकी शनिबार र आइतबारको अविरल वर्षासँगै आएको पहिरोले पुरेर पूर्ण रूपमा क्षतिग्रस्त भएको छ। स्वास्थ्यचौकीका अहेव जीवन पुन मगरका अनुसार,पहिरोले प्रसुती कक्षलाई पूर्ण रूपमा नष्ट गरेको छ र भवनभित्र पानीसहितको माटो पस्दा औषधि र अन्य सामग्रीमा क्षति पुगेको छ। अझैपनि माथिबाट माटो खस्ने क्रम जारी रहेको र यसले थप जोखिम निम्त्याएको उनले बताए।  

  दैनिक २० जना सेवाग्राही आउने यो स्वास्थ्यचौकीको नयाँ भवन निर्माणको प्रक्रिया पूरा नभएकाले पुरानो संरचनाबाटै सेवा सञ्चालन हुँदै आएको थियो। चन्द्रकोट गाउँपालिका–१ का वडाध्यक्ष घनश्याम खरेलले प्रहरी र गाउँपालिकासँग समन्वय भइरहेको र क्षति र अवस्था मूल्यांकन गरेर आवश्यक सेवा प्रवाह गरिने जानकारी दिए।

   यसैबीच,बर्सातसहितको पहिरोले जिल्लाका प्रमुख सडक मार्गहरू—कालिगण्डकी करिडोर र रिडी–रुद्रवेणी–वामी सडकलाई अवरुद्ध बनाएको छ। कालिगण्डकी करिडोरको बाराल्वास्थित खड्गकोटमा ठूलो पहिरो खसेपछि यातायात अवरुद्ध भएको छ भने रिडी–वामी–ताक्सर सडकमा दाहरे र लेदो नदीको पानीको बहाव बढेर सडक अवरुद्ध भएको छ। जिल्ला प्रहरी कार्यालय गुल्मीका प्रवक्ता गंगा बहादुर सारुका अनुसार,रिडी–तम्घास सडक भने सुचारु भएको छ भने अन्य दुई मार्गको मर्मतका लागि प्रयास जारी रहेको जानकारी दिए।
​