मध्यपुर थिमी पालिकामा मेकअप कार्यशालाबाट एशिया बुक अफ रेकर्ड्समा नाम दर्ता

भक्तपुर ,साउन २९

   भक्तपुर – युथ इको नेपालले मंगलबार, १२ अगस्त २०२५, भक्तपुरको थिमीमा एक भव्य मेकअप कार्यशालाको आयोजना गर्दैछ। यस कार्यशालामा २२,००० भन्दा बढी युवाहरूको सहभागिता रहने अपेक्षा गरिएको छ। यस कार्यक्रमको उद्देश्य एसिया बुक अफ रेकर्डमा नाम दर्ता गर्नु रहेको आयोजकले जानकारी दिएका छन्।

   कार्यक्रम बिहान १० बजेबाट सुरु हुने र दिनभर चल्नेछ। कार्यशालामा फेस मेकअप, हेयर स्टाइलिङ, छाला परीक्षण, नेल आर्ट लगायतका सीपहरू सिकाइनेछन्। यसका लागि ३० वटा मेकअप स्टुडियो र करिब १०० दक्ष प्रशिक्षकहरू तयारी अवस्थामा रहेका छन्।

    युथ इको नेपालका अध्यक्ष आकाश गजुरेलका अनुसार, यस कार्यक्रमको सफलता पछि प्रत्येक शनिबार मेकअप सीप सिकाउने कार्यशालाहरू नियमित रूपमा सञ्चालन गरिनेछन्। यस कार्यक्रम मार्फत लाखौं युवाहरूलाई मेकअप र सौन्दर्यकर्मीको रूपमा दक्ष बनाउने र भविष्यमा रोजगारीका अवसरहरू सिर्जना गर्ने योजना रहेको छ।

    कार्यक्रममा नेपाल कम्युनिष्ट पार्टी (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ लगायतका राजनीतिक नेता, कलाकार, र सामाजिक अभियानकारीहरूको उपस्थित रहने जनाइएको छ।

    कार्यशालामा मनोरञ्जनात्मक प्रस्तुति, अनुभव साझा, र अन्तरक्रियात्मक गतिविधिहरू समेत समावेश गरिनेछ। यस कार्यक्रमले युवाहरूलाई नयाँ सीप र अवसरहरूको बाटो खोल्ने विश्वास गरिएको छ।