दाङको घोराही पालिकामा मौरीपालनले नयाँ उचाइ छोयो

दाङ, ३० कात्तिक

    दाङ/घोराही — दाङ जिल्लामा व्यावसायिक मौरीपालनमा संलग्न किसानको संख्या तेजीसँग बढ्दै पाँच सयभन्दा माथि पुगेको छ। अनुकूल हावापानी र बजारमै माग बढेपछि जिल्लाभर मौरीपालन लोकप्रिय बन्दै गएको कृषि ज्ञान केन्द्र दाङले जनाएको छ।

   घोराही–१८ सुपैला खुटीका ५८ वर्षीय श्रीधन घर्ती पछिल्ला १७ वर्षदेखि मौरीपालनमै रमाइरहेका छन्। सात वर्ष वैदेशिक रोजगारीमा गएर फर्किएपछि सुरु गरिएको यस व्यवसायलाई अहिले उनले मुख्य आम्दानी स्रोतका रूपमा अगाडि बढाएका हुन्। घर्तीले घोराही–१३ डुम्बरगाउँमा सञ्चालन गर्दै आएको मौरीफार्ममा हाल १५० घार छन्। वर्षमा करीब सात टन मह उत्पादन गर्दै आएका उनले अधिकांश मह घरमै आएर ग्राहकले लिन थालेपछि बजार खोज्नुपर्ने झन्झट पनि हटेको बताए।
“लगानी धेरै लाग्दैन, आम्दानी राम्रो हुन्छ,” घर्ती भन्छन्, “आगामी वर्षहरूमा अझै विस्तार गर्ने योजना छ।”

   यसैगरी घोराही–ज्ञघ तुरुन्तपुरका ६० वर्षीय दीपक कुमार मगर दुई दशकभन्दा बढी समयदेखि मौरीपालन र मौरीको हेरचाहमै व्यस्त छन्। उनले मौरीपालनका लागि आवश्यक आधुनिक सामाग्री स्वयं उत्पादन गरी रोल्पा, सल्यान, प्युठानलगायत छिमेकी जिल्लामा पनि बिक्री गर्दै आएका छन्। दुई सय घार क्षमताको फार्म भए पनि हाल एक सय घारमा मौरी पालेका मगरले वर्षमा करिब ३५ क्विन्टल मह उत्पादन हुने जानकारी दिए। उनले पानी परिरहने समय र चिसो मौसममा विशेष हेरचाह गरेमा उत्पादन र आम्दानी दुवै बढ्ने बताए।

   घोराही–१८ गिठेपानीका कृष्णबहादुर डाँगी र जानकी डाँगी दम्पती पनि डेढ दशकदेखि मौरीपालनमा सक्रिय छन्। उनीहरूले १०५ घारबाट मासिक एक लाख रुपैयाँभन्दा बढी आम्दानी गर्दै आएका छन्। वार्षिक रूपमा उनीहरूको व्यवसायिक कारोबार करिब १३ लाख रुपैयाँ पुगेको छ।

   कृषि ज्ञान केन्द्रका सूचना अधिकारी तथा कृषि अर्थशास्त्री पृथ्वीराज लामिछानेका अनुसार दाङमा अहिले व्यावसायिक मौरीपालन गर्ने किसानको संख्या पाँच सयभन्दा बढी पुगेको छ। मौरीपालनबाट राम्रो प्रतिफल मिल्न थालेपछि किसानको आकर्षण पछिल्ला वर्षहरूमा झनै बढेको उनको भनाइ छ।