अग्निसाइर कृष्णासवरन गाउँपालिका: सुशासन र पारदर्शितामा जोड दिने चौधरीको घोषणा

राजविराज, मंसिर ६ 

     सप्तरीको अग्निसाइर कृष्णासवरन गाउँपालिकामा अध्यक्षको राजीनामापछि कार्यवाहक अध्यक्षको जिम्मेवारी सम्हालेकी उपाध्यक्ष कल्पनाकुमारी चौधरीले सुशासन, पारदर्शिता र जनमुखी सेवामा जोड दिने घोषणा गरेकी छन्।

  गत कात्तिक १८ गते बसेको गाउँपालिका बैठकले चौधरीलाई कार्यवाहक अध्यक्ष तोकेपछि उनले पालिकालाई पुनः व्यवस्थित बनाउन १० बुँदे प्राथमिकता सार्वजनिक गरेकी हुन्।

  उनले दलगत सीमाभन्दा माथि उठेर ‘जनताको सेवक’ को रूपमा काम गर्ने प्रतिबद्धता व्यक्त गर्दै पालिकावासीको विश्वास नै आफ्नो सबैभन्दा ठूलो पुँजी रहेको उल्लेख गरिन्। अध्यक्षको राजीनामापछि निर्णय प्रक्रियामा अस्पष्टता, सेवा प्रवाहमा ढिलाइ तथा प्रशासनिक कमजोरी देखिएको भन्दै त्यसलाई सुधार गर्नु पहिलो काम हुने बताइन्।

    चौधरीले गाउँटोलमै पुगेर जनताको समस्या सुन्ने कार्यक्रम अघि सारेकी छन्। प्रत्येक वडामा प्रत्यक्ष संवाद, सुझाव संकलन र गुनासा सुनुवाइ अभियान सञ्चालन हुने उनले जानकारी दिइन्।

  उनले सार्वजनिक गरेका १० प्राथमिकतामा सुशासन कायम गर्ने, बजेट तथा वित्तीय क्षेत्रमा पारदर्शिता लागू गर्ने, नागरिकमैत्री सेवा सुनिश्चित गर्ने, महिला–युवा तथा विपन्न वर्गका लागि लक्षित कार्यक्रम अघि बढाउने, शिक्षा–स्वास्थ्य र सामाजिक सुरक्षामा सुधार ल्याउने, पूर्वाधार विकासमा गुणस्तरको कडाइ गर्ने, भ्रष्टाचारविरुद्ध शून्य सहनशीलता अपनाउने, शाखा–उपशाखामा कार्य मूल्याङ्कन प्रणाली लागू गर्ने तथा सबै समुदाय र राजनीतिक दलसँग सहकार्यको वातावरण बनाउने विषय समावेश छन्।

  उनले गाउँपालिका, गाउँसभा सदस्य, प्रमुख प्रशासकीय अधिकृत र कर्मचारीलाई एउटै परिवारझैँ एकता र विश्वासका साथ सेवा प्रवाहमा समर्पित बनाउने प्रतिज्ञा गरेकी छन्।

‘गाउँपालिकाको सञ्चालन कागजी रूपमा होइन, जनताको घरआँगनमै पुगेर समस्या बुझेर समाधानमा उन्मुख बनाउनु आवश्यक छ,’ चौधरीले भनिन्।

उनका अनुसार नयाँ नेतृत्व शैली, प्रत्यक्ष संवाद र पारदर्शी अभ्यासले पालिकालाई ‘नयाँ गति, नयाँ लय र नयाँ भरोसा’ तर्फ डोर्याउनेछ।

  नेकपा एमालेबाट निर्वाचित अध्यक्ष दीनानाथ चौधरीले गत असोज ५ गते पदमा समय, ऊर्जा र दक्षता दिन नसकेको भन्दै राजीनामा दिएका थिए। त्यसपछि कार्यवाहक अध्यक्ष नतोकिँदासम्म पालिकाको सेवा प्रवाह प्रभावित भएको थियो।