भगवतीमाई गाउँपालिकामा गर्भवती ढुवानी चुनौती, महिलामै भरपर्दो अवस्था

दैलेख, मंसिर २४

   भगवतीमाई गाउँपालिका–३ मा बर्थिङ सेन्टर टाढा भएकाले गर्भवतीलाई स्ट्रेचरमा बोकेर स्वास्थ्य संस्थासम्म लैजानुपर्ने अवस्था छ। गाउँमा एम्बुलेन्स सुविधा नहुँदा महिलामात्रै यस काममा भरपर्ने गरिएको छ।

   मेलतोलीकी अमृताकुमारी खड्कालाई सुत्केरी पीडा लागेपछि परिवार र छिमेकीले स्ट्रेचरमा एक घण्टा हिँडेर बर्थिङ सेन्टर पुर्‍याएका थिए। गर्भावस्थादेखि सुत्केरीसम्म स्वास्थ्य आमा समूह र महिला स्वयंसेविकाले उनलाई निरन्तर ख्याल गरेका थिए।

   गाउँका धेरै पुरुष रोजगारीका लागि बाहिर गएकाले गर्भवतीलाई बोकेर लैजाने जिम्मा महिला स्वयंसेविकामाथि पर्छ। वडाध्यक्ष मानबहादुर खड्काका अनुसार गाउँभर ८१ स्वास्थ्य आमा समूह सक्रिय छन् र एम्बुलेन्स व्यवस्थापनका लागि पहल भइरहेको छ।

  समुदायमा सञ्चालन भइरहेको परियोजनाको सहयोगमा हाल घरमै सुत्केरी हुने दर शून्य पुगेको छ र मातृ–नवजात मृत्यु नभएको स्वास्थ्यकर्मीले बताएका छन्। आकस्मिक अवस्थामा सहयोग गर्न स्वास्थ्य आमा समूहले ‘सुरक्षित मातृत्व कोष’ पनि सञ्चालन गरेका छन्।