इटहरी उपमहानगरपालिकाले रु २ अर्ब ५५ करोडको बजेट पारित, भौतिक पूर्वाधारमा प्राथमिकता

​
इटहरी, १ भदौ 

   इटहरी उपमहानगरपालिकाले आर्थिक वर्ष २०८२/८३ का लागि रु २ अर्ब ५५ करोड २१ लाखको बजेट ५३ औं नगरसभा बैठकमा पारित गरेको छ। यस अघि, बजेटको विनियोजन अनुसूची बिना पेश गर्दा एमालेका निर्वाचित जनप्रतिनिधिहरूले असन्तुष्टि जनाएका थिए। मेयर हेमकर्ण पौडेलले अनुसूची प्रस्तुत गर्न तयार भएपछि बजेट पारित भएको हो।

  बजेटमा चालु खर्चका लागि रु १ अर्ब ४ करोड ११ लाख १० हजार, वित्तीय व्यवस्थापनका लागि रु ९० लाख र पूंजीगत खर्चका लागि रु १ अर्ब ५० करोड १९ लाख ९० हजार विनियोजन गरिएको छ। उपप्रमुख संगीताकुमारी चौधरीका अनुसार, चालु आर्थिक वर्षमा भौतिक पूर्वाधारलाई प्राथमिकता दिइएको छ।

  यस सहमति जुटाउनका लागि पटकपटक दुवै पक्षबीच छलफल भएको थियो। नगरसभा स्थगित भएका कारण ब्यानरमा पुरानै मिति राखिएको छ।

​