कटहरिया नगरपालिकामा १५ दिनपछि तालाबन्दी खुलेर सेवा सुचारु

रौतहट, कात्तिक २५ 

    रौतहटको कटहरिया नगरपालिकामा करार र दैनिक ज्यालादारी कर्मचारीहरूले बक्यौता तलब–भत्ता भुक्तानीको माग गर्दै गरेका तालाबन्दी १५ औँ दिनमा खुलेको छ।

कर्मचारीहरूले लामो समयदेखि तलब नपाएको भन्दै आन्दोलन गर्दै नगरपालिकाको कार्यालयमा तालाबन्दी गरेका थिए। तर, मेयर अजय प्रकाश जैसवालले समस्या समाधानका लागि पहल नगरेपछि ९ वटै वडाअध्यक्ष र नगर कार्यपालिका सदस्यहरूको सहमतिमा सोमबार साँझ ताला खोलिएको हो।

  वडाअध्यक्ष चन्दन कुशवाहाका अनुसार, कर्मचारीहरूको तलब तत्काल निकासा गर्ने र समस्या समाधान नभए पुनः तालाबन्दी गर्ने सर्तमा सहमति भएको छ। “मेयरले ध्यान नदिएपछि हामी सबै वडाअध्यक्ष र कार्यपालिका सदस्यहरूले एकमत भएर ताला खोल्ने निर्णय गरेका हौँ,” उनले भने।

कार्यपालिका सदस्य मनोज कुमार जैसवालले मेयरले तत्काल बैठक बोलाएर सहमति कार्यान्वयन नगरेसम्म कुनै प्रस्तावमा हस्ताक्षर नगर्ने निर्णय पनि भएको जानकारी दिए।

   यसैबीच, नगरपालिकामा नयाँ प्रमुख प्रशासकीय अधिकृत कार्यभार सम्हालेका छन्। उनले पहिलो प्राथमिकतामा कर्मचारीहरूको तलब निकासा गर्ने प्रतिबद्धता जनाएपछि कार्यालय पुनः सञ्चालनमा आएको हो।