नवराजपुर गाउँपालिकामा ब्राउन सुगरसहित २ युवक पक्राउ

 सिराहा, ३० कात्तिक

   सिराहा — सिराहामा प्रहरीले भारतबाट नेपालतर्फ प्रवेश गर्दै गरेका दुई युवकलाई अवैध लागुऔषधसहित पक्राउ गरेको छ। हिजो साँझ करिब ६:४० बजे इलाका प्रहरी कार्यालय झाझपट्टीबाट खटिएको टोलीले नवराजपुर गाउँपालिका–४ मा स १० प ७८६ नम्बरको मोटरसाइकल जाँच गर्ने क्रममा ब्राउन सुगर जस्तो देखिने पदार्थ फेला पारेपछि दुबै जनालाई नियन्त्रणमा लिएको जनाएको छ।

  पक्राउ पर्नेमा सप्तरीको सुरुङ्गा नगरपालिका–७ चक्रदहका २१ वर्षीय विक्रान्त चौधरी र मोटरसाइकलमा पछाडि सवार सिराहा लहान नगरपालिका–१ मटिहरवाका २६ वर्षीय शीतल चौधरी छन्।

  उनीहरूको साथबाट प्लास्टिकमा राखिएको ब्राउन सुगर जस्तो पदार्थ तौल गर्दा १.६ ग्राम फेला परेको प्रहरीले जनाएको छ। बरामद गरिएको पदार्थसहित दुवै जनालाई नियन्त्रणमा लिएर थप अनुसन्धान सुरु गरिएको प्रहरीले जानकारी दिएको छ।