जहदा गाउँपालिकामा गाँजा तस्करी नियन्त्रण, दुई भारतीय पक्राउ

मोरङ, पुस १३

   नेपाल–भारत सीमा क्षेत्रअन्तर्गत मोरङको जहदा गाउँपालिकामा गाँजा तस्करी रोक्ने क्रममा प्रहरीले हवाई फायर गरेको छ। सो घटनामा ठूलो परिमाणको गाँजासहित दुई जना भारतीय नागरिक पक्राउ परेका छन्।

     शनिबार राति जहदा गाउँपालिका–२ तारिगामाबाट नेपालबाट भारततर्फ गाँजा लैजाँदै गरिएको भन्ने गोप्य सूचनाका आधारमा प्रहरीले विशेष अपरेसन सञ्चालन गरेको थियो। मोरङ प्रहरी प्रमुख एसपी कवित कटवालको निर्देशनमा जिल्ला प्रहरी कार्यालय मोरङबाट इन्स्पेक्टर सरोज खनालको नेतृत्वमा प्रहरी टोली खटिएको थियो।

    प्रहरी टोली घटनास्थलमा पुग्दा केही व्यक्तिहरू टाउकोमा गाँजाका बोरा बोकेर सीमा पार गर्ने तयारीमा रहेका थिए। प्रहरी देखेपछि तस्करीमा संलग्न व्यक्तिहरू बोरा छाडेर फरार हुन खोजेपछि नियन्त्रणका लागि प्रहरीले एक राउण्ड हवाई फायर गरेको जनाएको छ। 

   त्यस क्रममा भारतको अररिया जिल्लाका २४ वर्षीय अबुल हसन र ३० वर्षीय सोहेल खान पक्राउ परेका हुन्। उनीहरूबाट ३३० किलो गाँजा बरामद गरिएको प्रहरीले जनाएको छ।