राक्सिराङ–कैलाश गाउँपालिकामा अवैध गाँजा र अफिमखेती फडानी

बागमती, मकवानपुर

      मकवानपुर जिल्लाका राक्सिराङ र कैलाश गाउँपालिकामा अवैध रूपमा लगाइएको गाँजा तथा अफिमखेती प्रहरीले नष्ट गरेको छ। प्रहरीको विशेष अभियानअन्तर्गत करिब ३० बिघा क्षेत्रफलमा फैलिएको गाँजा र अफिमखेती फडानी गरिएको हो।

   जिल्ला प्रहरी कार्यालय मकवानपुरका प्रवक्ता पुष्कर बोगटीका अनुसार २१ बिघा क्षेत्रफलमा लगाइएको गाँजा र ९ बिघामा गरिएको अफिमखेती पूर्ण रूपमा नष्ट गरिएको छ।  उक्त अभियान राक्सिराङ गाउँपालिका–१, ६, ७ र ८ तथा कैलाश गाउँपालिका–१, २, ३, ५, ६ र ९ का विभिन्न स्थानमा सञ्चालन गरिएको थियो।

      प्रहरीले लागुऔषध दुरुपयोग तथा अवैध खेती नियन्त्रण गर्ने उद्देश्यले यो अभियान सञ्चालन गरिएको जनाएको छ। गाँजा तथा अफिम फडानीको कार्यलाई आगामी दिनमा पनि निरन्तरता दिइने प्रहरीले जनाएको छ।